الأحد، 16 نوفمبر 2008

السلام عليكم

انا كنت باكتب في اول الطلاق عن مشاعر كنت فعلا حاسه بها..........وبالفعل برضه لسه حاسه بها بس اقل........كنت اظن اني هانسي فتره الجواز الطويله بكل مافيها حلو او سيئ...............لكن اكتشفت ان لا يمكن ان انسي زي فقدان اي شخص عزيز عن الواحد هو بالفعل فقدان سنين من عمر الواحد ، لا يمكن ان تنسي ، لكن مايحدث انه بمرور الوقت تصبح ذكريات وتتباعد شيئا فشيئا لتصبح ذكريات بعيده الملامح ويتوه الواحد ساعات في تفاصيل صغيره تتبع للحدث نفسه ، اي عندما يحدث شئ مماثل لما حدث في السابق ، تلمع بداخلي اللمبه الحمراء لتستأذنني في ان اتذكر ماحدث لي في نفس الموقف، وعندما اسمح لها كشئ روتيني اجد اني اضيع في تفاصيل ماحدث لي من محاوله التذكر، في وقت الحدوث ومكان الحدوث وهل كان صباحا ولا مساءا وكان فين؟ومع مين وكنت لابسه ايه ولابس ايه ، و...........اضيع في الوسط وانسي انا اصلا كنت بافتكر الموضوع ده ليه؟؟؟؟؟؟؟؟؟؟وعندما اعيد الذاكره اجد ان الاحساس نفسه قد فقدته ، وانا الموضوع ضاع مع الذكري واصبح ذكري اخري .............وهكذا.
عند بدايه الطلاق ، قالوا لي انها كلها شهرين وتنسي تماما انك مطلقه..........مر الشهرين وخلالهم اصحي كل يوم اسال نفسي انا النهارده احساسي اقل؟ماعرفش لكن بالتاكيد كان يقل، سألت صديقاتي قدامي المطلقات، انتم امتي كده حسيتم انكم طبيعييين ومش فارق معاكم انكم مطلقات ، وبوضوح اكتر الاحساس الرهيب بفقدان البيت..-هاتكلم عن الموضوع ده في وقت اخر-، ناس متفائله قالت شهرين، لكن كتير قالوالي بالضبط سته اشهر.............لكن كلهم اجمعوا علي ان النسيان النهائي لا يوجد لكن وجوده كذكري مؤكد واختلاف الوقت ده يرجع للشخص ، ملابسات الطلاق ، والعلاقه بين الاثنين بعد الطلاق، اقصد وجود اطفال بينهم ومكوث الام في بيت الزوجيه لتربيتهم.............مواضيع كتيره اوي كنت دايما باتكلم فيها بضحك مع زميلاتي بتريقه لا يحس بها الا من عاناها.............لكن عموما احب اقول لكم ان الخطوط الحمراء التي يرسمها الواحد لنفسه عند بدايه الطلاق حتي تمر الفتره الاولي الصعبه ، تختفي تماما بعد فتره ويجد الواحد انه يقف في مواجهه نفسه بكل شجاعه وتحليل ماحدث معه بعقلانيه شديده جدا ..........وتكون هذه هي بدايه مرحله الشفاء تماما من تجربه مرت.
موضوع الطلاق ده كانه مرض السرطان لا يتكلم عنه اي حد في المجتمعات المفتوحه.ويكون موضوع رئيسي بين المطلقات فقط ، وكان هناك اتفاق غير مكتوب ان لا يذكر الا بينهن فقط ، يمكن حتي لا يظهر ضعف الواحده بعد الطلاق...........رغم ان الطبيعي جدا ان يكون هناك بعض الضعف بعده والا نكون نحن نتكلم عن غير البني ادميين!!!!
رغم انه مر وقت طويل قبل ان اكتب تاني ، وقت تعرفت فيه علي ناس جدد، تكلمت عن نفسي وسمعت منهم عن نفسهم ووجدت ان الطلاق في حد ذاته حاله من حالات الحياه العاديه ، وبالعكس وجدت بعض مممن تعرفت عليهم يحسدونني علي هذا الحاله التي لا تستطيع اتخاذها لوجود عقبات كثيره.......وما اذهلنني وجود حاله الطلاق الفعلي في بيوت كثير من المتزوجين ويتمنون اليوم الذي يخرجون فيه لحريتهم.

وإلي لقاء

الثلاثاء، 30 سبتمبر 2008

كل عام وانت بخير

السلام عليكم

كل عام وانتم بخير
بكره العيد ان شاء الله
امس كنت اكلم صديقه لي ، وتذكرت معها ماذا كنت افعل في عيد الفطر اثناء زواجي.............كنت انوي ان تفر الدمعه من عيني ...........لحظه ضعف عابره
وجدت صديقتي ترد علي وهي تأكل بمقاطعه مناسبه جدا وهي ان شاء الله هاتعملي اكتر منه عند اهلك!!!
هنا وقفت وتأملت .فعلا مر رمضان والحمد لله اقترابي من ربي احسست انه زاد .......... تعبدي وخشوعي ولجؤوي لله اصبح طبيعي جدا وليس كما كان من قبل، فكيف بالله يكون ماافعله في العيد مع عبيد الله اقل مما كنت افعله من قبل؟ بالطبع سوف يزيد
بالفعل اليوم عملت كل ماكنت احلم ان اعمله في اخر ايام رمضان..... من نزول للشارع ورؤيه الناس والتعييد علي الناس في بيوتهم.............الحمد لله كان هناك حلم وتحقق جزء كبير منه
كلمه اخيره...........اصدقائي الجدد الذين اكتشفتهم وحكيت لكم عنهم من قبل مازالوا هنا وكانوا من اول الناس التي تذكرتني في التعييد.فلا تقلقوا ان الله لا ينسي عبده علي الاطلاق.
كل سنه وانتم بخير

وإلي لقاء

الأربعاء، 24 سبتمبر 2008

السلام عليكم

بتمر اوقات علي المطلقين حديثا بينسوا فيهم انهم اتطلقوا خلاص وكل واحد بقي له طريق منفصل عن شريكه الاخر.
لا اقصد انهم بيحنوا لايامهم ولكن انه بينسي انه اصلا منفصل حاليا، فمثلا سؤال عادي من اي موظف او حتي ملأ خانه الحاله الاجتماعيه فتجد ايدك او لسانك بيتجه لخانه متزوجه رغم ان فيه خانه تانيه مكتوب فيها مطلق او مطلقه ، وينسي لثانيه ثم يرجع في قراره ويضع العلامه امام المطلق، ولكن انفصال الشخص عن رفيقه داخليا لا يكون بنفس السهوله التي ينفصل بها عنه خارجيا!
الحاجه التي ننعب المطلق هي رغبه من حوله بان ينسي تحربته المؤلمه سريعا............. والضيق الذي يواجهه اذا تكلم عنه . وكلام مثل احنا مش خلصنا خلاص ، كأن الكلام عنه قد يجعل الواحد يفكر في الرجوع له او الاتصال به .............والشخص المنفصل هو الوحيد الذي يعلم جيدا ان هناك كسر وجرح كبير لا يستطيع اي شئ ان يعيد ماكان .............ليس لان الطلاق حدث ولكن لانه داخليا قد انفصل عنه تماما ولكن هناك من المراره ما يجعل النسيان امر ليس من السهوله ان يحدث في وقت قصير وخاصه اذا كان الزواج قد استمر مده طويله وقد انطبعت عادات وخصوصيات الشريك في الواحد وانحفر بداخله كل شئ ولكي ينساه يجب ان يتم الحفر من الاول وهي عمليه بطيئه ومؤلمه جدا في نفس الوقت ولكن لايوجد اي مفر منها.

وإلي لقاء

الخميس، 18 سبتمبر 2008

لحظات الحنين

السلام عليكم

فيه مرحله تلي الطلاق بشهر او شهرين كده...........الواحد يبدا يحس بحنين لبيته ، لنمط حياته ، عند بعض الناس كمان لشريك حياته...........او بالاحري للحظات المشاركه، كتير ممن اعرفهم مطلقات مروا بهذه اللحظات كتير جدا.........لا اعرف الحقيقه ماذا فعلوا لحلها ولكني اعرف ماأفعله لحل لحظات اشتياقي الشديد جدا لروتين حياه سابقه..........انا بارفض ان اتذكر لحظات جميله ، بابحث عن المواقف التي ضايقتني، وصدقوني في حياه كل مطلقه كثير جدا منها والا ماكان حصل الطلاق...........كمان فرض الواجبات علي النفس من الاشياء المستحبه في هذه المرحله............مثلا قراءه كتاب تقيل، الضلوع بواجبات منزليه تقيله يمكن ان تشغل الواحد لفتره، الكتابه علي البلوج، معرفه ناس جدد او تجديد العلاقات القديمه.................الاجمل بقي ان كثير من الناس بيدورا علي ناس جديده حتي من غير طلاق...............وحسب احصائيه عملتها ...يوجد في كل بيت مطلقه والسبب الاعلي للطلاق معروف ومش محتاج اقوله ........يمكن لاي حد فينا يعرفه اذا بس بص حواليه......................انظر حولك.

وإلي لقاء

الأحد، 14 سبتمبر 2008

تغيير شااااااااااااااااااااااااااااااااااااااامل

السلام عليكم

بعد الطلاق ...........برضه.......بتبص الواحده تلاقي نفسها حياتها اتقلبت رأسا علي عقب.ويبقي في اول الموضوع متلهفه تماما تعرف ايه اللي بيحصل للطرف الاخر..........وتلاقي ناس ولاد حلال كده، قال ايه اصدقاء للطرفين.............بيحبوا اوي يكونوا حمامه الاخبار .يعني ينقلوا ايه اللي حصل لده لدي واللي حصل من دي لده .............. وشكله وشكلها ، وقال ايه وقالت ايه، ولما جت سيرتك بص او بصت بالشكل ده...........وغيره وغيره ، وحجتهم احنا بس بنهدي النفوس!!!!!!!!!!!!!!
دي اسوأ حاجه في الطلاق ..................عن نفسي بعد فتره معقوله من عمليه تهديه النفوس دي......قررت قرار لا رجعه فيه اني مش عايزه اسمع حاجه ، اصبح غريب عني وانا غريبه خلاص عنه يعني الكلام اصبح من غير لزمه ..........والاحسن اني كمان مش غيرت المواضيع دي ، لا كمان انا بدأت في تغيير الناس نفسهم ، يعني اي حد احس انه بيدور علي علشان يحكي لي ، جري ابعد عنه ، والاجمل اني دورت علي صداقات قديمه لا صله لها بالموضوع خالص حتي لا يذكرني حد بما حصل معي في مرحله الطلاق.
تغيير شامل......................يعني تغيير في اسلوب الحياه سواء من اصدقاء او غيرهم،اسلوب لبس، اسلوب خروج ، نوعيه اماكن ..................غيري من نفسك ابعدي عن ذكريات سواء كانت مفرحه او محزنه لانه في الوقت الذي يلي الطلاق، يجب محاوله نسيان المرحله كلها مش بس المحزن منها الي ان يتم سماع اي شئ عن هذه المرحله بدون التأثر.
المهم ان الواحد يعمل اي حاجه علشان يرفه عن نفسه.

وإلي لقاء

الثلاثاء، 9 سبتمبر 2008

نظره جديده

السلام عليكم

ميزه الطلاق ( ايوه والله فيه ميزات !)ان بعد فتره من البعد ، الواحد او الواحده بيلاقي نفسه بعد عن روتين نظره الدنيا ......... ايه الكلام الجامد اللي مش مفهوم ده؟
اقصد انه بيلاقي نفسه بيفكر بطريقه غير الطريقه اللي كان متعود عليها قبل كده..........خلص الهم ، خلص انتظار المشاكل ، خلص الحمل التقيل اللي كان الواحد شايله ومالوش لزمه.................... ويبدأ الواحد ينتظر الحياه الجديده التي يتمني من كل قلبه ان تعوضه عن مافات ..........ويمكن اجمل من الحياه نفسها هو حلاوه انتظارها.............. ياه مر كتير اوي قبل ان يحس الواحد ان لسه هناك حياه جديده ممكن ان يمن الله علي الواحد بها بعد فتره ليست قليله من تعاسه ليس لها نهايه.
الحمد لله

وإلي لقاء

الجمعة، 5 سبتمبر 2008

أصدقاء .................جدد !!!

السلام عليكم
بعد الفراق.........اقصد بعد الطلاق( تأثرا بشهر رمضان ومسلسلاته) ، بيكون فيه اصدقاء مشتركين ، والواحد مابيعرفش يعمل ايه معاهم ، لانهم اما من جهه المرأه او من جهه الرجل ، لكن في النهايه هم اصدقاء مشتركين............. ومنهم كتير بياخدوا الموضوع من ناحيه واحده علشان يخلصوا ومايتعبوش دماغهم .
انا بقي حصل لي حاجه غريبه وحلوه اوي ........لقيت ناس كانوا يعتبروا من المعارف وليس الاصدقاء انقلبوا لاصدقاء حقيقين ، مش بس اصدقاء لكن اهل والله .........حتي اصدقاء ظهروا من العدم من سنين طويله ، ناس قابلتهم بحكم علاقه عمل ....وعرفوا بظروفي ...جاءت وقفتهم جانبي مثل النسمه الرطبه في يوم حر( تاني متأثره برمضان) ......... وقتها حسيت قد ايه ربنا سبحانه وتعالي عوضني باصدقاء محن بدلا من اصدقاء اقصد ناس ..............كنت اعتبرهم اصدقاء.
فسبحانك ياربي دايما كريم
وإلي لقاء

الجمعة، 29 أغسطس 2008

السلام عليكم

من الاشياء الروتينيه في الحياه المشتركه ، مشاركه الاخبار واستطلاع انباء جديده عن اصدقاء او زملاء مشتركين ( نميمه بالمعني الاشمل)
بعد الفراق يحدث عندما تسمع خبر جديد ان تتخيل للحظه كيف ستقوله لشريكك وتصعق عندما تجد انه لا مجال لهذا بعد الآن ، ولا تجد احد يعرف ويحس الخبر كما كان يحسه هو ..............ربما لانه عن اصدقاء مشتركين بينكم فقط ، ولا تعرف كيف تحتفظ بالخبر لك وحدك وتفكر هل من وسيله غير مهينه لقول هذا الخبر له بدون المواجهه المباشره ...........................ثم تفزع عندما تعرف ان هذا الخبر بالذات لا اهميه له الآن لانه ايضا عن فراق زوجين كان بينهم عشره طويله مثلنا ...........بالاحري كما قلنا مثلي انا وهو لان نا الجمع اصبحت لا تعني الآن شيئا.

وإلي لقاء

الثلاثاء، 26 أغسطس 2008

عباءه الآخر

السلام عليكم

عباءه الآخر تعني الرأي المشترك في معظم الاحيان ، سواء الرأي ده مجامله ، تعود، او فعلا توحد المزاج بعد العشره الطويله.
الخروج من هذه العباءه هو من اصعب المواقف لانك تجد نفسك تردد نفس الكلام مثلا عن هذه الممثله او الممثل او المسلسل او المخرج، ايضا توحد الراي المميت في نوعيه الخروج والفسحه ، لان المزاج اصبح واخد علي طريقه معينه لها ، طريقه اللبس ، طريقه انتظار الأخر والانبساط فيها .............. اشياء كثيره لم يكن الواحد قد فكر في كيفيه التفرد بالراي فيها لانه ببساطه وقتها كان لا يفعل الا مايسعد شريكه...............
بعد ادراك انه يردد نفس الكلام بنفس الطريقه ..... تظهر علامات تعجب واستفهام متسائله انا فين من هذا كله ؟هل تلاشيت تماما في الأخر ؟وتبدا مرحله جديده من ادراك ان الأخر اصبح حاليا بالفعل أخر وليس نفس الشخص ( وربما كان هذا من فتره ولكن تطنيش العلامات كان من روتين العلاقه العادي ) وتبدا مرحله بناء شخص من جديد ورؤيه الاشياء بعين جديده ومحاوله اكتشافها من جديد.
هي مرحله كئيبه ومفرحه في نفس الوقت لان الواحد يبدا يحس انه انسان جديد وله رأي يمثله كشخصه وليس تابع لأخر مهما كانت معزه هذا الأخر..........ملخص الموضوع انها بدايه شخص جديد لحياه جديد .
وإلي لقاء

السبت، 23 أغسطس 2008

التعود القاتل

السلام عليكم

اسوأ مافي الطلاق هو الخروج من التعود القاتل علي اشياء لمده طويله ومحاوله نسيان الروتين المصاحب لها.
مثلا تعود روتين الاستيقاظ الصباحي وتحضير القهوه والشاي .........انا وجدت وسيله لنسيانها بأن غيرت القهوه الي ماء دافئ مع ليمون ولذلك خفت شويه حاله التعود وصحبه شرب الشاي.......مع العلم انه في بعض ( او كثير من ) الاحيان تكون الذكري والعاده نفسها مصاحبه لمزاج مضطرب وانتظار للشجار ، ولكن وجود العاده نفسها يكون في العقل الباطن وليس في العقل الواعي واذا خير الشخص لكانت اول مايتمني نسيانها ليس لتعبه من الذكري الحلوه بقدر ماهو تعب ايضا من تأهبه الدائم لانتظار النكد...........عموما الطلاق رغم انه ابغض الحلال الا انه خلاص للطرفين .
انا كنت ناويه اكتب فكاهي ولكن من الواضح ان مودي(my mood) مش في الفورمه ! ان شاء الله قريبا

وإلي لقاء

الخميس، 21 أغسطس 2008

السلام عليكم
انا سيده مطلقه من اسبوعين بالتمام، ايه السبب ، مين اللي طلب، مش هايفرق، لان دائما في حالات الطلاق لايوجد منتصر ومهزوم، يعني كلا الطرفين منتصرين وفي نفس الوقت مهزومين.
مايعنيني في هذا المدونه هو حالة اي من الطرفين بعد حدوث الطلاق الفعلي ، وانفصال اتنين كانوا حتي قبل النطق بالكلمه ، انسان واحد وكانت كلمه احنا هي مايرمز لهم ، وفي ثانيه واحده انقلبت الكلمه الي انا وهو او هي ، وانقلبت الذكريات الجميله والسيئه الي مهيجات للبكاء وانفلات النفس في نهيج لا يقف الا بانتهاك المجهود وجفاف العين من الدموع.
الشئ الجميل في الانفصال هو الامل الجديد لحياه جديده منتظره في الخفاء، والامل في الاحساس من جديد بنبض القلب بعد فتره معقوله من رثاء النفس.
مدونتي فكاهيه اكتر منها فلسفيه ، وربما كنت اكتب فيها الآن لاني احتاج ان انقل احاسيسي الي يدي وان اطردها سريعا من دماغي حتي لا تتغلب علي.
وإلي لقاء